ఢిల్లీలో ఓట్ బచావో దేశ్ బచావో ర్యాలీకి టీపీసీసీ సమన్వయ కమిటీ

న్యూఢిల్లీలోని రామ్లీలా మైదాన్లో నిర్వహించనున్న ఓట్ బచావో దేశ్ బచావో మెగా నేషనల్ ర్యాలీ విజయవంతం కోసం తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు, ఎమ్మెల్సీ బి. మహేష్ కుమార్ గౌడ్ ఐదుగురు సభ్యులతో కూడిన సమన్వయ కమిటీని నియమించారు.

ఈ జాతీయ ర్యాలీకి తెలంగాణ నుంచి హాజరయ్యే నాయకులకు ప్రయాణం, వసతి, ఇతర అవసరమైన సౌకర్యాల కల్పనతో పాటు సంబంధిత ఏర్పాట్లను సమర్థవంతంగా సమన్వయం చేయడం ఈ కమిటీ ప్రధాన బాధ్యత.

నియమితులైన సభ్యులు

మంత్రులు పొన్నం ప్రభాకర్ గౌడ్, వాకిటి శ్రీహరి ముదిరాజ్, ఎంపీలు డాక్టర్ మల్లు రవి, పి. బలరాం నాయక్, చామల కిరణ్ కుమార్ రెడ్డిలను మహేష్ కుమార్ నియమించారు.

జాతీయ స్థాయిలో నిర్వహించనున్న ఈ ర్యాలీకి సంబంధించి తెలంగాణ నుంచి పాల్గొనే నాయకులకు ఎలాంటి ఇబ్బందులు లేకుండా అవసరమైన ఏర్పాట్లు చేయడం, ప్రయాణం మరియు వసతి అంశాల్లో సమన్వయంతో వ్యవహరించడం కోసం కమిటీ సభ్యులకు బాధ్యతలు అప్పగించారు.