జనాభా గణన వివరాలు పారదర్శకంగా నమోదు చేయాలి: కలెక్టర్ కుమార్ దీపక్

జిల్లా కలెక్టర్ కుమార్ దీపక్ మాట్లాడుతూ, జనగణన మొదటి దశలో గృహాల జాబితా తయారీ ప్రక్రియను విజయవంతంగా పూర్తి చేసిన అధికారులు, సిబ్బంది ప్రస్తుతం రెండవ దశలో జనాభా గణనను ఖచ్చితత్వంతో, పారదర్శకంగా నిర్వహించాలని సూచించారు. జనగణనకు సంబంధించిన అన్ని అంశాలపై ఛార్జ్ అధికారులు పూర్తి అవగాహన కలిగి ఉండాలని, క్షేత్రస్థాయిలో ఎన్యూమరేటర్లకు అవసరమైన మార్గదర్శకాలు అందించాలని తెలిపారు. జనగణన ప్రశ్నావళిలోని ప్రతి ప్రశ్నపై స్పష్టమైన అవగాహన కలిగి ఉండాలని, ఏ వివరాలను ఏ విధంగా నమోదు చేయాలనే అంశంపై పూర్తి పట్టు సాధించాలని కలెక్టర్ సూచించారు. అధికారులకు రెండు రోజుల పాటు శిక్షణ అందించనున్నందున, ఈ అవకాశాన్ని సద్వినియోగం చేసుకొని, అన్ని అంశాలను క్షుణ్ణంగా నేర్చుకోవాలని కోరారు. శిక్షణలో భాగంగా డెమో యాప్ను ప్రత్యక్షంగా చూపించనున్నందున, దాని వినియోగంపై పూర్తి అవగాహన పెంపొందించుకోవాలని, ఏవైనా సందేహాలుంటే వెంటనే నివృత్తి చేసుకోవాలని సూచించారు.

జనగణన ద్వారా సేకరించే వివరాలు 16వ ఆర్థిక సంఘం నిధులు, గ్రాంట్లు, గ్రామ పంచాయతీలు, మున్సిపాలిటీలకు సంబంధించిన నిధుల కేటాయింపులపై ప్రభావం చూపే అవకాశం ఉన్నందున, సమాచార సేకరణలో అత్యంత జాగ్రత్తగా వ్యవహరించాలని కలెక్టర్ కుమార్ దీపక్ తెలిపారు. ఎన్యూమరేటర్లు ప్రతి ప్రశ్నను సంబంధిత వ్యక్తిని అడిగి, సమాధానాలను నిబంధనల ప్రకారం నమోదు చేయాలని సూచించారు. మతం, కులం, వైవాహిక స్థితి, వివాహ సమయానికి వయస్సు, తండ్రి, తల్లి పేర్లు, పుట్టిన తేదీ, జన్మస్థలం, మతం వివరాలు, దివ్యాంగత్వానికి సంబంధించిన వివరాలు, అక్షరాస్యత స్థితి, డిజిటల్ అక్షరాస్యత, విద్యాసంస్థలలో ప్రస్తుతం చదువుతున్నారా అనే వివరాలు, 11వ తరగతి / అంతకంటే పై తరగతులలో చదివిన వారికి వర్తించే అత్యున్నత విద్యార్హత, విద్యా విభాగం (స్ట్రీమ్) వివరాలు, ప్రతి ప్రశ్నకు సంబంధించిన ఉద్దేశాన్ని అర్థం చేసుకొని, సమాధానాలను సక్రమంగా, స్పష్టంగా నమోదు చేయాలని తెలిపారు. జనాభా గణన ప్రక్రియలో ఎన్యూమరేటర్లు అడగవలసిన ప్రశ్నలను వదిలివేయకుండా ప్రతి వివరాలను సేకరించాలని, ప్రతి వివరాలను బాధ్యతాయుతంగా, ఖచ్చితత్వంతో నమోదు చేయాలని కలెక్టర్ ఆదేశించారు.

శిక్షణలో భాగంగా జనగణన శిక్షకులు జనాభా గణన ప్రశ్నావళిలోని వివిధ అంశాలపై అధికారులకు వివరించారు. ముఖ్య ప్రణాళిక అధికారి పాపయ్య, డైరెక్టరేట్ ఆఫ్ సెన్సస్ ఆపరేషన్స్ రాష్ట్ర కన్సల్టెంట్ కె. కృష్ణయ్య, డి.వై.ఎస్.ఓ. రాజేందర్, మాస్టర్ ట్రైనర్ శరణ్య, తహసిల్దార్లు, మండల పరిషత్ అభివృద్ధి అధికారులు, సంబంధిత జనగణన అధికారులు ఈ కార్యక్రమంలో పాల్గొన్నారు.