మంచేరియల్, 2026-07-16
తెలంగాణ సాంఘిక సంక్షేమ గురుకుల విద్యాలయాల సంస్థ (టిజిఎస్డబ్ల్యుఆర్ఐఈఎస్) ఆధ్వర్యంలో నడుస్తున్న గురుకులాల్లో తాత్కాలిక అధ్యాపకులు, ఉపాధ్యాయుల ఖాళీల భర్తీకి ప్రక్రియ ప్రారంభమైంది. అర్హులైన అభ్యర్థుల నుంచి దరఖాస్తులు స్వీకరించనున్నట్లు సంస్థ సమన్వయకర్త కోటూరి రామ కళ్యాణి తెలిపారు. జిల్లాలోని 9 గురుకుల పాఠశాలలు, జూనియర్ కళాశాలల్లో ఈ నియామకాలు జరగనున్నాయి.
తెలంగాణ సాంఘిక సంక్షేమ గురుకుల విద్యాలయాల సంస్థ (టిజిఎస్డబ్ల్యుఆర్ఐఈఎస్) ఆధ్వర్యంలో నడుస్తున్న గురుకులాల్లో తాత్కాలిక అధ్యాపకులు, ఉపాధ్యాయుల భర్తీకి చర్యలు చేపడుతున్నట్లు టిజిఎస్డబ్ల్యుఆర్ఐఈఎస్ సమన్వయకర్త కోటూరి రామ కళ్యాణి తెలిపారు. జిల్లాలోని 9 సాంఘిక సంక్షేమ గురుకుల పాఠశాలలు, జూనియర్ కళాశాలల్లో ఆంగ్ల మాధ్యమంలో బోధించడానికి అవసరమైన తాత్కాలిక బోధనా సిబ్బందిని ఎంపిక చేసేందుకు అర్హులైన అభ్యర్థుల నుంచి దరఖాస్తులు ఆహ్వానిస్తున్నట్లు ఆమె పేర్కొన్నారు.
సైన్స్, ఆర్ట్స్ కళాశాలల్లో అందుబాటులో ఉన్న ఖాళీల మేరకు జూనియర్ లెక్చరర్ / పిజిటి / టిజిటి / స్పెషల్ టీచర్ల పోస్టులకు ఈ నెల 23వ తేదీ సాయంత్రం 4 గంటలలోపు లక్షెట్టిపేట మండల కేంద్రంలోని సాంఘిక సంక్షేమ గురుకుల బాలికల పాఠశాల/కళాశాల కార్యాలయంలో పనివేళల్లో దరఖాస్తులు స్వీకరిస్తారు. 25వ తేదీన జూనియర్ లెక్చరర్, పిజిటి క్యాడర్ ఖాళీలకు, 27వ తేదీన టిజిటి, స్పెషల్ టీచర్ క్యాడర్ పోస్టులకు సంబంధించిన తరగతి బోధన పరిశీలన ఉదయం 9 గంటల నుంచి రెండు రోజుల పాటు నిర్వహించబడుతుంది.
జూనియర్ లెక్చరర్, పిజిటి పోస్టులకు యుజిసి గుర్తింపు పొందిన విశ్వవిద్యాలయం నుంచి కనీసం 50 శాతం మార్కులతో సంబంధిత సబ్జెక్టులో పిజి డిగ్రీతో పాటు బి.ఇడి. అర్హత ఉండాలి. టిజిటి పోస్ట్ కు యుజిసి గుర్తింపు పొందిన విశ్వవిద్యాలయం నుంచి బి.ఎస్సీ./బి.ఎ./బి.కాం. డిగ్రీలో కనీసం 50 శాతం మార్కులతో పాటు బి.ఇడి. అర్హత తప్పనిసరి.
అభ్యర్థులు నిర్దేశిత తేదీలలో తమ పూర్తి బయోడేటాతో పాటు విద్యార్హతలకు సంబంధించిన ఒరిజినల్ ధ్రువపత్రాలు, వాటి నకలు ప్రతులను లక్షెట్టిపేట మండల కేంద్రంలోని సాంఘిక సంక్షేమ గురుకుల బాలికల కళాశాలలో సకాలంలో హాజరుపరచాలి. బాలికల విద్యాలయాల్లో పనిచేయడానికి మహిళా అభ్యర్థులు మాత్రమే అర్హులు. ప్రకటించిన ఖాళీలలో ఎంపిక కమిటీ నిర్ణయానికి లోబడి మార్పులు ఉండవచ్చు.
జిల్లాలో మొత్తం 40 పోస్టులు ఖాళీగా ఉన్నాయి. పురుషులకు జూనియర్ లెక్చరర్ విభాగంలో ఫిజిక్స్, కెమిస్ట్రీ, బాటనీ, జువాలజీ, సివిక్స్ సబ్జెక్టులలో ఒక్కో పోస్టు; పిజిటి విభాగంలో మ్యాథమెటిక్స్, బయోసైన్స్, సోషల్ స్టడీస్లో ఒక్కో పోస్టు, ఇంగ్లీష్లో 2 పోస్టులు; టిజిటి విభాగంలో బయో సైన్స్లో ఒక పోస్టు; పార్ట్ టైం హిందీలో 4 పోస్టులు; ఆర్ట్ టీచర్ 2 పోస్టులు; లైబ్రరీలో ఒక పోస్టు ఉన్నాయి.
మహిళలకు జూనియర్ లెక్చరర్ విభాగంలో ఇంగ్లీష్, కెమిస్ట్రీ, సివిక్స్ సబ్జెక్టులలో ఒక్కో పోస్టు; మ్యాథమెటిక్స్ సబ్జెక్టులో 2 పోస్టులు; పిజిటి విభాగంలో ఇంగ్లీష్, మ్యాథమెటిక్స్, ఫిజికల్ సైన్స్, బయోలాజికల్ సైన్స్, సోషల్ స్టడీస్ సబ్జెక్టులలో ఒక్కో పోస్టు; టిజిటి విభాగంలో మ్యాథమెటిక్స్, బయోలాజికల్ సైన్స్, సోషల్ స్టడీస్లో ఒక్కో పోస్టు; హిందీ పార్ట్ టైం 4 పోస్టులు; పి.ఇ.టి./ పి.డి. 2 పోస్టులు; మ్యూజిక్ టీచర్, క్రాఫ్ట్ టీచర్, లైబ్రేరియన్, స్టాఫ్ నర్స్ లలో ఒక్కో పోస్టు కేటాయించారు.
