వరి ధాన్యం కొనుగోలు ప్రక్రియలో రాష్ట్ర ప్రభుత్వం విఫలమైందని, దీనివల్ల రైతులు తీవ్రంగా నష్టపోతున్నారని బీజేపీ రాష్ట్ర ఉపాధ్యక్షులు రఘునాథ్ వెరబెల్లి ఆరోపించారు. హాజీపూర్ మండలం గడ్ పూర్ గ్రామంలోని కొనుగోలు కేంద్రాన్ని ఆయన సందర్శించారు.
రైతులు ధాన్యాన్ని కొనుగోలు కేంద్రానికి తరలించి 15 రోజులు గడిచినా కొనుగోలు ప్రారంభం కాకపోవడం దారుణమని రఘునాథ్ వెరబెల్లి అన్నారు. సరైన సమయంలో కొనుగోలు చేపట్టకపోవడంతో, అకాల వర్షాలకు ధాన్యం తడిసి రైతులు నష్టపోతున్నారని ఆయన ఆవేదన వ్యక్తం చేశారు.
నిబంధనల ప్రకారం తేమ శాతం 0.8 ఉన్నప్పటికీ, రాష్ట్ర ప్రభుత్వం తరుగు పేరుతో అదనంగా రెండు కిలోలు కాంటా పెట్టి రైతులను దోచుకుంటుందని ఆయన విమర్శించారు. జిల్లా కలెక్టర్ ఆదేశాలు క్షేత్ర స్థాయిలో అమలు కావడం లేదని ఆయన పేర్కొన్నారు.
కాంటా పెట్టిన ధాన్యాన్ని సరైన సమయంలో రైస్ మిల్లులకు రవాణా చేయడంలో కూడా ప్రభుత్వం విఫలమైందని, లారీల కొరత సమస్యగా మారిందని ఆయన తెలిపారు.
తక్షణమే ధాన్యం కొనుగోలును వేగవంతం చేసి, ఎలాంటి తరుగు లేకుండా కొనుగోలు చేసి, కొనుగోలు రసీదులు ఇవ్వాలని రఘునాథ్ వెరబెల్లి డిమాండ్ చేశారు.
