మంచేరియల్, 2026-07-14
సింగరేణిలో పనిచేస్తున్న కాంట్రాక్టు కార్మికులకు కోల్ ఇండియా ఒప్పందం ప్రకారం హైపవర్ కమిటీ వేతనాలు అమలు చేయాలని కోరుతూ సింగరేణి కాంట్రాక్టు కార్మికుల ఐక్య సంఘం (సిటియు) నాయకులు కేంద్ర బొగ్గు & గనుల శాఖ మంత్రి శ్రీ కిషన్ రెడ్డికి మెమోరాండం సమర్పించారు. ఈ వేతనాల అమలులో జరుగుతున్న జాప్యంపై కార్మికులు అసంతృప్తి వ్యక్తం చేశారు.
సింగరేణిలో పనిచేస్తున్న కాంట్రాక్టు కార్మికులకు కోల్ ఇండియాలో జరిగిన అగ్రిమెంట్ ప్రకారంగా హైపవర్ కమిటీ వేతనాలు అమలు చేసే విధంగా తగిన చర్యలు తీసుకోవాలని సింగరేణి కాంట్రాక్టు కార్మికుల ఐక్య సంఘం (సిటియు) నాయకత్వ బృందం కేంద్ర బొగ్గు & గనుల శాఖ మంత్రి శ్రీ కిషన్ రెడ్డికి మెమోరాండం అందజేసింది.
భరోసా యాత్రలో భాగంగా శ్రీరాంపూర్ డివిజన్ పరిధిలోని ఎస్ఆర్పి -3కి విచ్చేసిన మంత్రిని సంఘం నాయకులు కలిసి ఈ వినతి చేశారు. కోల్ ఇండియాలో 2013లో జరిగిన ఒప్పందం ప్రకారం కాంట్రాక్టు కార్మికులకు హై పవర్ కమిటీ వేతనాలు అమలు అవుతున్నాయని, అయితే తెలంగాణలోని సింగరేణిలో మాత్రం దీనిని అమలు చేయడంలో నిర్లక్ష్యం వహిస్తున్నారని వారు ఆరోపించారు.
దీనివల్ల ఒక్కో కార్మికుడు నెలకు దాదాపు రూ.19 వేలకు పైగా నష్టపోతున్నారని సంఘం నాయకులు తెలిపారు. సింగరేణిలో కూడా హైపవర్ కమిటీ వేతనాలు చెల్లించాలని అనేక పోరాటాలు జరుగుతున్నా ప్రభుత్వాలు, యాజమాన్యం పట్టించుకోవడం లేదని పేర్కొన్నారు. 30 వేల మంది కాంట్రాక్టు కార్మికుల జీవితాల్లో భరోసా కల్పించే హైపవర్ కమిటీ వేతనాలను అమలు చేయాలని, 2013 నుంచి రావాల్సిన ఏరియర్స్ డబ్బులను కూడా ఇప్పించాలని కోరారు.
ఈ కార్యక్రమంలో సింగరేణి కాంట్రాక్టు కార్మికుల ఐక్య సంఘం (సిటియు) బెల్లంపల్లి రిజియన్ అధ్యక్ష కార్యదర్శులు గట్టు మహేందర్, దూలం శ్రీనివాస్, కాసీపేట రాజేశం (శ్రీరాంపూర్ డివిజన్ కార్యదర్శి), గుజ్జేటి రమేష్, తలారి లక్ష్మణ్ తదితరులు పాల్గొన్నారు.
