అంతర్జాతీయ కార్మిక దినోత్సవం సందర్భంగా, సింగరేణి కాలరీస్ ఎంప్లాయిస్ యూనియన్ (CITU) ఆధ్వర్యంలో రామకృష్ణాపూర్, మందమర్రి ఆఫీసులలో ఎర్రజెండాలు ఎగురవేసి, కార్మిక హక్కుల పరిరక్షణ కోసం పోరాడాలని పిలుపునిచ్చారు. కేంద్ర ప్రభుత్వం తీసుకువచ్చిన 12 గంటల పని విధానాన్ని CITU తీవ్రంగా ఖండించింది.
మే డే సందర్భంగా CITU ఆధ్వర్యంలో జరిగిన ఈ కార్యక్రమంలో, చికాగో అమరవీరులను స్మరించుకున్నారు. బ్రాంచ్ అధ్యక్ష కార్యదర్శులు S. వెంకట స్వామి, అల్లి రాజేందర్ మాట్లాడుతూ, కార్మికుల హక్కులను కాలరాస్తున్న కేంద్ర ప్రభుత్వ విధానాలను విమర్శించారు.
కేంద్ర ప్రభుత్వం 8 గంటల పని విధానాన్ని 12 గంటలకు పెంచడం కార్మిక వ్యతిరేక నిర్ణయమని, దీనిని రాష్ట్ర ప్రభుత్వం వ్యతిరేకించాలని డిమాండ్ చేశారు. లేబర్ కోడ్లను అమలు చేయబోమని అసెంబ్లీలో తీర్మానం చేయాలని కోరారు.
కొన్ని కార్మిక సంఘాలు పార్టీల ఆదేశాల మేరకు పనిచేస్తూ కార్మికుల ప్రయోజనాలకు విఘాతం కలిగిస్తున్నాయని ఆరోపించారు. అన్ని కార్మిక సంఘాలు ఏకతాటిపైకి వచ్చి ప్రభుత్వాలు, యాజమాన్యాలపై పోరాడి హక్కులను సాధించుకోవాలని పిలుపునిచ్చారు.
సంస్థలను కాపాడుకోవాల్సిన బాధ్యత కార్మికులపై ఉందని, పాలకులు సంస్థలను నిర్వీర్యం చేస్తున్నారని CITU నాయకులు పేర్కొన్నారు. చికాగో అమరవీరుల స్ఫూర్తితో కొత్త పోరాటాలకు సిద్ధం కావాలని కార్మికులకు పిలుపునిచ్చారు.
