మహిళల భద్రతను బలోపేతం చేసే లక్ష్యంతో, రామగుండం పోలీస్ కమీషనరేట్ పరిధిలో మంచిర్యాల జిల్లా షీ టీమ్స్ ఆధ్వర్యంలో సింగరేణి పారిశుధ్య కార్మికులకు ప్రత్యేక అవగాహన సదస్సు నిర్వహించారు. ఈ కార్యక్రమం సీసీసీ నస్పూర్ టౌన్షిప్లో జరిగింది.
తెల్లవారుజాము నుంచే విధులకు హాజరయ్యే మహిళా పారిశుధ్య కార్మికుల భద్రతను దృష్టిలో ఉంచుకుని ఈ సదస్సును ఏర్పాటు చేసినట్లు షీ టీమ్ సిబ్బంది తెలిపారు. మహిళలు ధైర్యంగా ఉండాలని, వారికి అండగా, రక్షణగా షీ టీమ్స్ ఎల్లప్పుడూ ఉంటాయని వారు భరోసా ఇచ్చారు.
ఈ సందర్భంగా, మహిళలకు చట్టపరంగా కల్పించబడిన హక్కులు, వేధింపుల నుంచి రక్షణ పొందే మార్గాలపై కార్మికులకు వివరించారు. ఈవ్టీజింగ్, సైబర్ నేరాలు, ట్రాఫిక్ నిబంధనలు, షీ టీమ్స్ విధులు, మహిళల భద్రతకు సంబంధించిన కీలక అంశాలపై అవగాహన కల్పించారు.
అత్యవసర పరిస్థితుల్లో పోలీసులను సంప్రదించే విధానం గురించి తెలియజేస్తూ, డయల్-100, రామగుండం షీ టీమ్ వాట్సాప్ నంబర్ 6303923700, మంచిర్యాల జిల్లా షీ టీమ్ నంబర్ 8712659385లను తెలియజేశారు. సమాచారం అందించిన వారి వివరాలను గోప్యంగా ఉంచుతామని భరోసా కల్పించారు.
తెలంగాణ రాష్ట్ర ప్రభుత్వం మహిళల భద్రతకు అత్యంత ప్రాధాన్యత ఇస్తూ రాష్ట్రవ్యాప్తంగా పటిష్టమైన చర్యలు చేపడుతోందని, మహిళలు ఎటువంటి వేధింపులకు గురైనా భయపడకుండా వెంటనే పోలీసులను సంప్రదించి ఫిర్యాదు చేయాలని సూచించారు. ఈ కార్యక్రమంలో షీ టీమ్ సిబ్బంది, కానిస్టేబుళ్లు, కాంట్రాక్టర్, సూపర్వైజర్, సింగరేణి పారిశుధ్య కార్మికులు పాల్గొన్నారు.
