తెలంగాణ రాష్ట్రంలో ఆర్టీసీ సమ్మె పిలుపు నేపథ్యంలో, పెద్దపల్లి డీసీపీ బి. రామ్ రెడ్డి గోదావరిఖని, మంథని ఆర్టీసీ డిపోలను సందర్శించి, శాంతి భద్రతలపై కట్టుదిట్టమైన చర్యలు తీసుకుంటామని తెలిపారు.
ఆర్టీసీ సమ్మె నేపథ్యంలో, పెద్దపల్లి జోన్ పరిధిలోని గోదావరిఖని, మంథని ఆర్టీసీ డిపోలను పెద్దపల్లి డీసీపీ బి. రామ్ రెడ్డి పోలీస్ అధికారులతో కలిసి సందర్శించారు. డిపోలలో పరిస్థితులను సమీక్షించి, ఆర్టీసీ ఉద్యోగులతో మాట్లాడారు.
సమ్మెను ప్రజాస్వామ్య హక్కుగా గౌరవిస్తున్నామని, అయితే అది పూర్తిగా శాంతియుతంగా జరగాలని డీసీపీ సూచించారు. ఎటువంటి అవాంఛనీయ సంఘటనలు జరగకుండా సహకరించాలని కోరారు. ప్రభుత్వ లేదా ప్రైవేట్ ఆస్తులకు నష్టం కలిగించినా, అధికారులపై దాడులకు పాల్పడినా కఠిన చర్యలు తప్పవని హెచ్చరించారు.
ఉద్యోగుల సమస్యలను శాంతియుతంగా వ్యక్తం చేయాలని, చట్టాన్ని గౌరవించాలని సూచించారు. ప్రజలకు ఇబ్బందులు కలగకుండా చర్యలు తీసుకుంటున్నామని, ప్రైవేట్ డ్రైవర్లు, తిరిగి విధుల్లో చేరే ఆర్టీసీ డ్రైవర్లకు పూర్తి భద్రత కల్పిస్తామని హామీ ఇచ్చారు.
డిపో పరిసరాల్లో భద్రతా ఏర్పాట్లను పరిశీలించిన డీసీపీ, నిరంతర పెట్రోలింగ్ నిర్వహించాలని, అనుమానాస్పద వ్యక్తులపై వెంటనే స్పందించాలని సిబ్బందికి ఆదేశాలు జారీ చేశారు. ప్రజలు శాంతి భద్రతలకు సహకరించాలని, వదంతులను నమ్మవద్దని, సమస్యలు గమనిస్తే పోలీసులకు సమాచారం అందించాలని విజ్ఞప్తి చేశారు.
