తెలంగాణ రాష్ట్రంలో గంజాయి, ఇతర మత్తు పదార్థాల నిర్మూలన లక్ష్యంగా మందమర్రి పట్టణంలో పోలీసులు ముమ్మరంగా తనిఖీలు చేపట్టారు. రామగుండం పోలీస్ కమిషనర్ ఆదేశాల మేరకు, ప్రత్యేక శిక్షణ పొందిన నార్కోటిక్ డాగ్ సహాయంతో అనుమానాస్పద ప్రాంతాలలో సోదాలు నిర్వహించారు.
రాష్ట్రవ్యాప్తంగా డ్రగ్స్ నిర్మూలనకు ప్రభుత్వం, ఉన్నతాధికారులు ప్రత్యేక దృష్టి సారించిన నేపథ్యంలో, మందమర్రి పోలీసులు ఈ చర్యలు చేపట్టారు. సీఐ పర్సా రమేష్, ఎస్ఐ నరేష్ ఆధ్వర్యంలో బస్టాండ్ ఏరియా, డబల్ బెడ్ రూమ్ ఇండ్ల సముదాయాల పరిసరాల్లో తనిఖీలు జరిగాయి.
ఈ తనిఖీల్లో మత్తు పదార్థాలను గుర్తించడంలో ప్రత్యేక శిక్షణ పొందిన నార్కోటిక్ డాగ్ ను ఉపయోగించారు. అనుమానాస్పద ప్రదేశాలలో క్షుణ్ణంగా సోదాలు నిర్వహించి, ఎటువంటి అక్రమ కార్యకలాపాలు జరగకుండా నిఘా పెట్టారు.
పోలీసు అధికారులు మాట్లాడుతూ, మత్తు పదార్థాల అలవాటు వల్ల యువత తమ భవిష్యత్తును నాశనం చేసుకుంటున్నారని ఆవేదన వ్యక్తం చేశారు. గంజాయి విక్రేతలు, రవాణాదారులపై కఠిన చర్యలు తప్పవని హెచ్చరించారు. సమాజాన్ని మత్తు రహితంగా మార్చేందుకు పోలీసుల నిరంతర అప్రమత్తత అవసరమని తెలిపారు.
