మంచిర్యాల జిల్లా కలెక్టర్ కుమార్ దీపక్, జనగణన-2027 కార్యక్రమంలో భాగంగా చేపట్టిన ఇండ్ల గణనను నిబంధనల ప్రకారం, అప్రమత్తతతో నిర్వహించాలని ఎన్యుమరేటర్లు, సూపర్వైజర్లకు సూచించారు. పెరుగుతున్న ఉష్ణోగ్రతల నేపథ్యంలో ఉదయం వేళల్లోనే గణన పూర్తి చేసేలా ప్రణాళిక రూపొందించుకోవాలని ఆదేశించారు.
చెన్నూర్ మండల కేంద్రంలో బుధవారం జరిగిన ఇండ్ల గణనపై శిక్షణా కార్యక్రమంలో కలెక్టర్ పాల్గొన్నారు. ఈ సందర్భంగా ఆయన మాట్లాడుతూ, మే 11 నుంచి ప్రారంభం కానున్న ఇండ్ల గణన ప్రక్రియను సమర్థవంతంగా చేపట్టాలని తెలిపారు. ఇండ్ల యజమానులకు ముందుగా సమాచారం అందించడం ద్వారా గణన సులభతరం అవుతుందని, పంచాయతీ కార్యదర్శులు, మున్సిపల్ కమిషనర్ల సహకారంతో ముందుకు సాగాలని సూచించారు.
గతంలో ఎన్నికల విధుల్లో అనుభవం ఉన్న అధికారులు, ఎలాంటి పొరపాట్లు లేకుండా గణన పూర్తి చేయాలని కలెక్టర్ ఆకాంక్షించారు. శిక్షణలో సందేహాలను నివృత్తి చేసుకోవాలని, క్షేత్రస్థాయిలో సమస్యల పరిష్కారానికి గ్రూపులు ఏర్పాటు చేసుకోవాలని సూచించారు. భవిష్యత్తులో ప్రభుత్వ సంక్షేమ పథకాలు, ఎన్నికల నిర్వహణ వంటి కీలక అంశాలు జనగణనపై ఆధారపడి ఉంటాయని, కాబట్టి ఈ ప్రక్రియను అత్యంత పకడ్బందీగా నిర్వహించాల్సిన అవసరాన్ని ఆయన నొక్కి చెప్పారు.
ఇంతకుముందు కలెక్టర్ చెన్నూర్ మండలంలో వివిధ అభివృద్ధి పనులను కూడా పరిశీలించారు. డిగ్రీ కళాశాల అదనపు తరగతి గదులు, స్కిల్ డెవలప్మెంట్ సెంటర్, 100 పడకల ఆసుపత్రి ప్రహరీ గోడ, కస్తూరిబా గాంధీ బాలికల విద్యాలయంలో అదనపు గదులు, భోజనశాల, వంటశాల నిర్మాణ పనులను ఆయన సందర్శించి, పనులను వేగవంతం చేయాలని, విద్యార్థులకు మెరుగైన సదుపాయాలు కల్పించాలని అధికారులకు సూచనలు చేశారు.
