ఆదిలాబాద్ జిల్లా కేంద్రంలో కాంగ్రెస్ పార్టీ నిర్వహించిన బీఎల్ఏ-2 సమావేశంలో పాల్గొన్న పెద్దపల్లి ఎంపీ గడ్డం వంశీకృష్ణ, బీజేపీ ప్రభుత్వ చర్యలను తీవ్రంగా విమర్శించారు. ఎన్నికల వ్యవస్థను ప్రభావితం చేసే ప్రయత్నాలు, ఓట్ల తొలగింపు వంటి చర్యలు ప్రజాస్వామ్యానికి ప్రమాదకరమని ఆయన ఆరోపించారు.
ఆదిలాబాద్ పార్లమెంట్ కాంగ్రెస్ ఇంచార్జ్గా జిల్లాకు చేరుకున్న ఎంపీ వంశీకృష్ణకు పార్టీ నాయకులు, కార్యకర్తలు ఘన స్వాగతం పలికారు. అనంతరం జరిగిన సమావేశంలో సంస్థాగత బలోపేతం, ఓటరు జాబితాల పరిశీలన, బూత్ స్థాయి కార్యాచరణపై చర్చించారు.
ఎంపీ మాట్లాడుతూ, దేశంలో ఎన్నికల వ్యవస్థను ప్రభావితం చేసేలా బీజేపీ కుట్రలు చేస్తోందని ఆరోపించారు. ఎస్ఐఆర్ పేరుతో ఎన్నికల కమిషన్ను ముందుంచి, కాంగ్రెస్ పార్టీకి బలంగా ఉన్న నియోజకవర్గాల్లో ఓట్ల తొలగింపునకు ప్రయత్నాలు జరుగుతున్నాయని విమర్శించారు. ఏ బూత్లో ఏ పార్టీకి ఎక్కువ మద్దతు ఉందో గుర్తించి, అక్కడ ఓటర్లను లక్ష్యంగా చేసుకోవడం ప్రజాస్వామ్యానికి ప్రమాదకరమని ఆయన పేర్కొన్నారు.
రాహుల్ గాంధీ ముందుకు తెచ్చిన “ఓటు చోరీ” అంశాన్ని దేశ ప్రజలు ఇప్పుడు కళ్లారా చూస్తున్నారని ఎంపీ తెలిపారు. అంబేద్కర్ కల్పించిన ఓటు హక్కును దూరం చేసే ప్రయత్నాలను ప్రజాస్వామ్య శక్తులు కలిసి తిప్పికొట్టాలని పిలుపునిచ్చారు. ప్రతి బీఎల్ఏ అంబేద్కర్ స్ఫూర్తితో పనిచేస్తూ, ప్రతి బూత్లో ఓటు హక్కును పరిరక్షించే బాధ్యత తీసుకోవాలని సూచించారు.
నీట్ పరీక్షల నిర్వహణపై కూడా ఎంపీ ఆందోళన వ్యక్తం చేశారు. వరుస పేపర్ లీకేజీలతో విద్యార్థుల భవిష్యత్తు ప్రశ్నార్థకంగా మారుతోందని, దేశవ్యాప్తంగా నిరసనలు వ్యక్తమవుతున్నా కేంద్రం స్పందించకపోవడం బాధాకరమని అన్నారు. విద్య, ఉపాధి అవకాశాల విషయంలో యువతకు భరోసా కల్పించాలని కోరారు. తెలంగాణ రాజకీయాలపై స్పందిస్తూ, బీజేపీ, బీఆర్ఎస్ ప్రజలను తప్పుదారి పట్టించే ప్రయత్నం చేస్తున్నాయని, యువతను రెచ్చగొట్టే రాజకీయాలు మంచివి కావని, చదువు, ఉపాధిపై దృష్టి పెట్టేలా రాజకీయాలు ఉండాలని పేర్కొన్నారు.
