ధాన్యం కొనుగోలులో నిబంధనల పాటింపుపై అధికారులకు సూచనలు

జిల్లా అదనపు కలెక్టర్ (రెవెన్యూ) వి.రాములు ఆదివారం లక్షెట్టిపేట మండలం ఇటిక్యాలలో వరి ధాన్యం కొనుగోలు కేంద్రాన్ని సందర్శించి, అక్కడ నెలకొన్న సమస్యలను అధికారులతో కలిసి పరిష్కరించారు. ఈ సందర్భంగా ఆయన మాట్లాడుతూ, రైతు సంక్షేమం కోసం ప్రభుత్వం ఏర్పాటు చేసిన కొనుగోలు కేంద్రాల ద్వారా మద్దతు ధరకు నాణ్యమైన ధాన్యాన్ని సేకరిస్తున్నట్లు తెలిపారు. కొనుగోలు ప్రక్రియలో నిబంధనల ప్రకారం ధాన్యం పరిశీలించి, కొనుగోలు అనంతరం గోదాములకు, రైస్ మిల్లులకు తరలింపు ప్రక్రియను సమర్థవంతంగా చేపట్టాలని ఆదేశించారు.

మండల కేంద్రంలోని తహసిల్దార్ కార్యాలయంలో కొనుగోలు కేంద్రాల నిర్వాహకులతో నిర్వహించిన సమీక్షలో, ధాన్యం లోడింగ్, అన్ లోడింగ్ అంశాలపై చర్చించారు. అకాల వర్షాల కారణంగా తడవకుండా ధాన్యాన్ని గోదాములలో నిల్వ చేసేందుకు, లారీలు, ట్రాక్టర్ల ద్వారా తరలించేందుకు ప్రభుత్వం అవకాశం కల్పించిందని తెలిపారు. గోదాముల సామర్థ్యం, హమాలీల సంఖ్యను పూర్తిగా వినియోగించుకుంటూ నిల్వలను సమర్థవంతంగా నిర్వహించాలని సూచించారు.

అనంతరం జైపూర్ మండలం ఇందారం, రామారావుపేటలోని సుముఖ గోదామును సందర్శించి, మిల్లర్లు, గోదాము నిర్వాహకులతో మాట్లాడి ధాన్యం దిగుమతిపై పలు సూచనలు చేశారు. జిల్లాలో ప్రస్తుతం 12 రైస్ మిల్లులు పనిచేస్తున్నాయని, కేటాయించిన ప్రకారం వచ్చిన లారీల నుండి ధాన్యం దిగుమతి చేసుకోవాలని తెలిపారు. ఈ నెల చివరి వరకు వీలైనంత ధాన్యం కొనుగోలు పూర్తి చేయాలని, 80 శాతం కొనుగోలు లక్ష్యాన్ని చేరుకునేలా చర్యలు తీసుకోవాలని సూచించారు.

జిల్లాలో మిల్లింగ్ సామర్థ్యాన్ని పెంచేందుకు, రవాణా వాహనాలను తగిన విధంగా కేటాయించి, వరి ధాన్యం రవాణా, అన్‌లోడింగ్ ప్రక్రియను వేగవంతం చేయాలని ఆదేశించారు. కొనుగోలు ప్రక్రియలో రైస్ మిల్లులు, లారీలు, హమాలీలు, కొనుగోలు కేంద్రాలలో తలెత్తే సమస్యలను పరిష్కరించేందుకు యంత్రాంగం సిద్ధంగా ఉందని తెలిపారు. ఈ కార్యక్రమంలో సంబంధిత అధికారులు పాల్గొన్నారు.