రాష్ట్రంలోని యువతలో విదేశీ ఉపాధిపై ఆసక్తిని పెంచేందుకు, ముఖ్యంగా జర్మనీకి అవసరమైన నైపుణ్యాలు మరియు భాషా ప్రావీణ్యంతో పెద్ద సంఖ్యలో యువతకు శిక్షణ ఇచ్చి విదేశాలకు పంపే దిశగా చర్యలు తీసుకోవాలని కార్మిక, ఉపాధి మరియు గనుల శాఖ మంత్రి డా. జి. వివేక్ వెంకటస్వామి అధికారులను ఆదేశించారు.
విజయవంతమైన ప్లేస్మెంట్లు ఇతర యువతను కూడా విదేశీ ఉద్యోగాల వైపు ఆకర్షిస్తాయని మంత్రి పేర్కొన్నారు. క్యాపాసిటీ బిల్డింగ్ ప్రాముఖ్యతను ప్రస్తావిస్తూ, “ట్రైనర్స్కు శిక్షణ” (ట్రైనింగ్ ది ట్రైనర్స్) అత్యంత అవసరమని ఆయన చెప్పారు. భాషా బోధన కోసం నైపుణ్యం కలిగిన ట్రైనర్లను వెంటనే నియమించాలని, ముఖ్యంగా జర్మన్ భాషా శిక్షణను బలోపేతం చేయాలని అధికారులను ఆదేశించారు.
సోమవారం సచివాలయంలోని తన ఛాంబర్లో తెలంగాణ ఓవర్సీస్ మాన్పవర్ కంపెనీ (TOMCOM) బోర్డు సమావేశానికి మంత్రి అధ్యక్షత వహించారు. ఈ సమావేశంలో విదేశీ ఉపాధికి సంబంధించిన పలు కీలక అంశాలపై చర్చ జరిగింది. జర్మనీలో నైపుణ్య కార్మికులు మరియు చదువుకున్న యువతకు విస్తృత అవకాశాలు ఉన్నాయని మంత్రి పేర్కొంటూ, ఈ అవకాశాలను తెలంగాణ యువత వినియోగించుకునేలా TOMCOM చురుగ్గా పనిచేయాలని సూచించారు.
రాష్ట్ర యువతకు విదేశీ ఉపాధి అవకాశాలను అందించే విశ్వసనీయ అధికారిక సంస్థ TOMCOM అని ఆయన స్పష్టం చేశారు. GCC దేశాల్లో కార్మికుల నియామకాలపై జరుగుతున్న చర్యల గురించి అధికారులు మంత్రికి వివరించారు. విదేశాల్లో పనిచేస్తున్న కార్మికుల నుంచి నిరంతరం అభిప్రాయాలను సేకరించి, నివేదికలు సమర్పించాలని మంత్రి ఆదేశించారు.
ప్రతి దేశానికి ప్రత్యేకమైన సంస్కృతి ఉంటుందని, ఆ దేశాల సంస్కృతిపై కూడా యువతకు అవగాహన కల్పించేలా శిక్షణ ఇవ్వాలని మంత్రి సూచించారు. TOMCOM ద్వారా శిక్షణ మరియు నియామకాల విషయంలో లక్ష్యాధారిత ప్రణాళికలు రూపొందించాలని అధికారులను ఆదేశించారు. TOMCOM పనితీరును, సామర్థ్యాన్ని మరింత మెరుగుపరచాలని, విదేశీ ఉపాధి కార్యక్రమాల్లో తెలంగాణ ఇతర రాష్ట్రాలకు ఆదర్శంగా నిలవాలని మంత్రి అన్నారు. రాష్ట్ర యువతకు ప్రపంచ స్థాయి ఉపాధి అవకాశాలను కల్పించడంలో తెలంగాణ ప్రభుత్వం కట్టుబడి ఉందని, ఈ లక్ష్యాన్ని సాధించడానికి అవసరమైన అన్ని చర్యలు తీసుకుంటున్నట్లు మంత్రి పునరుద్ఘాటించారు.
