మంచిర్యాల పట్టణంలోని కాలేజీ రోడ్డులో ఒక అద్దె ఇంట్లో జరిగిన సంఘటన తీవ్ర కలకలం రేపింది. ఒక మహిళ అక్రమ సంబంధం నేపథ్యంలో రెండు వర్గాల మధ్య వాగ్వాదం చోటుచేసుకోవడంతో ప్రధాన రోడ్డుపై ఉద్రిక్త వాతావరణం నెలకొంది. విషయం తెలుసుకున్న పోలీసులు వెంటనే సంఘటనా స్థలానికి చేరుకుని పరిస్థితిని అదుపులోకి తెచ్చేందుకు ప్రయత్నించారు.
ఈ సంఘటనతో అక్కడ పెద్ద ఎత్తున ప్రజలు గుమిగూడారు. రెండు వర్గాల మధ్య ఘర్షణ వాతావరణం ఏర్పడకుండా పోలీసులు ఇరు వర్గాలకు నచ్చజెప్పే ప్రయత్నం చేశారు.
ఇంటి యజమానులకు పోలీసుల సూచనలు
ఇల్లు అద్దెకు ఇచ్చే సమయంలో ఇంటి యజమానులు, అద్దెకు వచ్చే వారి పూర్తి వివరాలు, ఆధార్ కార్డులు, వారి నేపథ్యం తెలుసుకుని, పోలీసులకు సమాచారం అందించిన తర్వాతే అద్దెకు ఇవ్వాలని పోలీసులు సూచిస్తున్నారు. గుర్తు తెలియని వ్యక్తులకు ఇష్టానుసారంగా ఇల్లు అద్దెకు ఇవ్వడం వల్ల ఇలాంటి సమస్యలు తలెత్తుతున్నాయని పోలీసులు తెలిపారు.
శాంతి భద్రతలకు భంగం కలిగించవద్దని, ఎవరూ చట్టాన్ని చేతిలోకి తీసుకోవద్దని పోలీసులు విజ్ఞప్తి చేశారు.
