నీట్ పరీక్షల నిర్వహణలో కేంద్రం వైఫల్యం: ఎంపీ వంశీకృష్ణ విమర్శలు

నీట్ పరీక్షల నిర్వహణలో కేంద్ర ప్రభుత్వం వైఫల్యం చెందిందని పెద్దపల్లి ఎంపీ గడ్డం వంశీకృష్ణ ఆరోపించారు. విద్యార్థుల భవిష్యత్తుతో కేంద్రం ఆడుకుంటోందని ఆయన ఒక ప్రకటనలో పేర్కొన్నారు.

ప్రశ్నాపత్రాల లీకేజీల వల్ల లక్షలాది మంది విద్యార్థులు మానసిక వేదనకు గురయ్యారని ఎంపీ తెలిపారు. పరీక్షకు కొద్ది నిమిషాలు ఆలస్యమైన విద్యార్థులను అనుమతించకపోవడం అన్యాయమని విమర్శించారు.

కేంద్ర విద్యాశాఖ మంత్రి, ప్రధాని విద్యార్థుల సమస్యలపై బాధ్యతాయుతంగా వ్యవహరించాలని ఆయన సూచించారు. పేపర్ లీకేజీలను అరికట్టడంలో విఫలమై, విద్యార్థుల భవిష్యత్తును నాశనం చేసే నిర్ణయాలు తీసుకోవడం సరికాదని స్పష్టం చేశారు.

విద్యార్థులు, తల్లిదండ్రుల ఆవేదన ప్రభుత్వానికి శాపంగా మారుతుందని హెచ్చరించారు. యువత ఆశయాలను గౌరవించి, వారి భవిష్యత్తును కాపాడేలా కేంద్రం చర్యలు తీసుకోవాలని డిమాండ్ చేశారు.