హైదరాబాద్లో బీజేపీ రాష్ట్ర పదాధికారుల సమావేశం జరిగింది. ఈ సమావేశానికి బీజేపీ జాతీయ అధ్యక్షులు శ్రీ నితిన్ నబిన్ గారు ముఖ్య అతిథిగా హాజరయ్యారు. రాష్ట్ర అధ్యక్షులు శ్రీ ఎన్. రామచందర్ రావు అధ్యక్షతన జరిగిన ఈ కార్యక్రమంలో పలువురు ముఖ్య నాయకులు పాల్గొన్నారు.
మంచిర్యాల నియోజకవర్గంలో అనారోగ్యంతో బాధపడుతున్న K. శ్రీనివాస్ అనే పేదవాడికి మంచిర్యాల ఎమ్మెల్యే సాగరన్న అండగా నిలిచారు. ముఖ్యమంత్రి సహాయనిధి (CMRF) ద్వారా రూ. 2,50,000/- విలువైన LOCని అందజేశారు.
జిల్లా వార్షిక రుణ లక్ష్యాలను పూర్తి స్థాయిలో సాధించేలా బ్యాంకర్లు కృషి చేయాలని జిల్లా కలెక్టర్ కుమార్ దీపక్ అన్నారు. సోమవారం నస్పూర్ లోని సమీకృత జిల్లా కార్యాలయాల భవన సమావేశ మందిరంలో వివిధ బ్యాంకుల అధికారులతో ఆయన సమీక్ష సమావేశం నిర్వహించారు. ఈ సందర్భంగా ఆయన మాట్లాడుతూ, 2026-27 ఆర్థిక సంవత్సరానికి గాను 8,796 కోట్ల రూపాయల లక్ష్యాన్ని నిర్దేశించినట్లు తెలిపారు.
రాష్ట్ర ప్రభుత్వ ఉద్యోగులకు తెలంగాణ ప్రభుత్వం మరోసారి హామీని నిలబెట్టుకుంది. ఆర్థిక ఇబ్బందులు ఉన్నప్పటికీ, ఉద్యోగులకు ఇచ్చిన మాట ప్రకారం రెండో విడతగా రూ. 2 వేల కోట్ల బకాయిలను విడుదల చేసింది. ఈ నిర్ణయం ఉద్యోగుల్లో హర్షం వ్యక్తమవుతోంది.
జిల్లాలో షెడ్యూల్డ్ కులములు, షెడ్యూల్డ్ తెగల అభివృద్ధికి చర్యలు తీసుకోవడం జరుగుతుందని జిల్లా కలెక్టర్ కుమార్ దీపక్ అన్నారు. సోమవారం నస్పూర్ లోని కలెక్టర్ సమావేశ మందిరంలో ఎస్.సి., ఎస్.టి. అట్రాసిటీ మానిటరింగ్ కమిటీ రాష్ట్ర సభ్యులు, పోలీసు, రెవెన్యూ, సంబంధిత శాఖల అధికారులు, కమిటీ సభ్యులతో సమీక్ష సమావేశం నిర్వహించారు. ఈ సందర్భంగా జిల్లా కలెక్టర్ మాట్లాడుతూ నెలకొన్న ఎస్.సి., ఎస్.టి. సమస్యలను పరిష్కరించి బాధితులకు సత్వర న్యాయం జరిగేలా చర్యలు తీసుకోవాలని సూచించారు.
ఓటరు జాబితా ప్రత్యేక సమగ్ర సవరణ ప్రక్రియను నిర్దేశిత కార్యాచరణ ప్రకారం సమర్థవంతంగా చేపట్టాలని రాష్ట్ర ప్రధాన ఎన్నికల అధికారి సుదర్శన్ రెడ్డి సూచించారు. సోమవారం వీడియో కాన్ఫరెన్స్ ద్వారా అన్ని జిల్లాల అధికారులతో నిర్వహించిన సమీక్షలో, జూలై 24 వరకు ఇంటింటి సర్వే, ఫారాల పంపిణీ, సేకరణ ప్రక్రియలను పూర్తి చేయాలని ఆదేశించారు.
ప్రజావాణి కార్యక్రమంలో అందిన దరఖాస్తులను పరిష్కరించడంపై అధికారుల సమన్వయంతో ప్రత్యేక చర్యలు తీసుకుంటామని జిల్లా కలెక్టర్ కుమార్ దీపక్ తెలిపారు. సోమవారం ఆయన అదనపు కలెక్టర్లు, జిల్లా రెవెన్యూ అధికారితో కలిసి అర్జీదారుల నుంచి దరఖాస్తులు స్వీకరించారు. మొత్తం 48 దరఖాస్తులు అందాయని ఆయన పేర్కొన్నారు.
మంచిర్యాల మున్సిపల్ కార్పొరేషన్ లో అవినీతి, సమస్యలపై ప్రశ్నించిన బీజేపీ మున్సిపల్ ఫ్లోర్ లీడర్ గాజుల ముఖేష్ గౌడ్ ను సస్పెండ్ చేయాలని కమీషనర్ కు ఆదేశాలు జారీ అయ్యాయి. దీనిని నిరసిస్తూ బీజేపీ జిల్లా అధ్యక్షులు నగునూరి వెంకటేశ్వర్ గౌడ్ ఆధ్వర్యంలో కార్పొరేటర్లు, శ్రేణులు ధర్నా చేపట్టారు. కార్పొరేషన్ లో కాంగ్రెస్ పాలన అవినీతిమయంగా మారిందని బీజేపీ ఆరోపించింది.
రాష్ట్ర ప్రభుత్వ ఆదేశాల మేరకు సింగరేణి సంస్థ గోదావరిఖనిలో అత్యాధునిక క్యాథ్ ల్యాబ్ను ఏర్పాటు చేసింది. రామగుండం-1 ఏరియా ఆసుపత్రిలో ఏర్పాటు చేసిన ఈ కేంద్రం త్వరలో ప్రారంభం కానుంది. దీని ద్వారా కోల్ బెల్ట్ ప్రజలకు అత్యాధునిక గుండె వైద్య సేవలు అందుబాటులోకి రానున్నాయి.
జిల్లా వైద్య ఆరోగ్యశాఖ అధికారి డాక్టర్ నరేందర్ రాథోడ్ మందమర్రి, మామిడిగూడ ప్రాథమిక ఆరోగ్య కేంద్రాలను ఆకస్మికంగా తనిఖీ చేశారు. గిరిజన ప్రాంతాల్లో అందిస్తున్న వైద్య సేవలపై ఆయన సంతృప్తి వ్యక్తం చేశారు. పల్స్ పోలియో కార్యక్రమంలో భాగంగా ఇంటింటి తనిఖీలను పర్యవేక్షించారు.
లక్షట్ పేట్ మండలం చందారం గ్రామంలో గాలి దుమారం వల్ల కూలిపోయిన నిరుపేద కుటుంబానికి చెందిన ఆకుల సత్తవ్వ ఇంటికి యువ భారత్ శక్తి ఫౌండేషన్ సభ్యులు రేకులు అందించారు. మందడపు అయ్యప్ప - సులోచన దంపతులు ఈ సహాయాన్ని అందజేశారు. ఈ సందర్భంగా ఫౌండేషన్ సభ్యులు సహాయం చేసిన వారికి కృతజ్ఞతలు తెలిపారు.
మంచిర్యాల జిల్లా మందమర్రి మండలంలోని బొక్కలగుట్ట ప్రాంతంలో ఆదివారం రాత్రి గజ్జి వెంకటేష్ అనే వ్యక్తి దారుణ హత్యకు గురయ్యాడు. కుటుంబ కలహాలే ఈ హత్యకు కారణమని ప్రాథమికంగా తెలుస్తోంది. దీనిపై పోలీసులు కేసు నమోదు చేసుకుని దర్యాప్తు చేస్తున్నారు.
ఓటరు జాబితా ప్రత్యేక సమగ్ర సవరణలో భాగంగా సేకరించిన ఓటర్ల వివరాలను బీఎల్ఓ యాప్లో స్పష్టంగా నమోదు చేయాలని జిల్లా కలెక్టర్ కుమార్ దీపక్ ఆదేశించారు. క్యాతనపల్లి మున్సిపల్ పరిధిలోని వార్డులలో జరుగుతున్న ఎన్యుమరేషన్ ప్రక్రియను ఆయన పరిశీలించి, అధికారులకు సూచనలు ఇచ్చారు. జూలై 24 వరకు ఇంటింటి కార్యక్రమం పారదర్శకంగా నిర్వహించాలని సూచించారు.
శ్రీరాంపూర్ ఏరియా జీఎం కార్యాలయం సమీపంలోని జాతీయ రహదారిపై ఆదివారం జరిగిన ఘోర రోడ్డు ప్రమాదంలో ఇంటర్ విద్యార్థి సాయి సునీల్ మృతిచెందాడు. మరో ముగ్గురికి తీవ్ర గాయాలయ్యాయి. రోడ్డు పక్కన ఆగి ఉన్న లారీని వెనుక నుంచి వచ్చిన కారు ఢీకొట్టడమే ఈ ప్రమాదానికి కారణమని పోలీసులు తెలిపారు.
మంచిర్యాల నియోజకవర్గంలో ఓటరు సవరణ ప్రక్రియపై మాజీ డీసీసీ అధ్యక్షురాలు శ్రీమతి కొక్కిరాల సురేఖ ప్రేమ్ సాగర్ రావు గారు దృష్టి సారించారు. ఆమె ఇంటింటి సర్వే కార్యక్రమంలో పాల్గొని ఓటర్లకు ఎన్యూమరేషన్ ఫారాలను అందజేశారు. అనంతరం పిల్లలకు పల్స్ పోలియో చుక్కలు వేసిన ఆమె, ఓటు హక్కు ప్రాముఖ్యతను వివరించారు.
ఫేక్ వార్తలను ప్రచారం చేసేవారిపై చట్టపరమైన చర్యలు తీసుకుంటామని అంజనీపుత్ర రియల్ ఎస్టేట్ యాజమాన్యం హెచ్చరించింది. సోషల్ మీడియాలో తమపై జరుగుతున్న దుష్ప్రచారాన్ని నమ్మవద్దని, తప్పుడు వార్తలు వ్యాప్తి చేస్తే జైలుకేనని హెచ్చరికలు జారీ చేసింది. కోట్లాది రూపాయల పరువు నష్ట దావాకు సిద్ధమని ప్రకటించింది.
సింగరేణి సివిల్ కార్యాలయానికి చెందిన సుమారు రూ.4,40,000 విలువైన 110 ఐరన్ పైపులను అక్రమంగా తరలిస్తున్న కేసులో సింగరేణి సివిల్ సూపర్వైజర్, స్క్రాప్ వ్యాపారితో సహా ఆరుగురిని పోలీసులు అరెస్ట్ చేశారు. ఈ ఘటన శ్రీరాంపూర్ పోలీస్ స్టేషన్ పరిధిలో చోటుచేసుకుంది.
జిల్లాలోని నస్పూర్ మండల కేంద్రంలో రూ. 1.34 కోట్లతో నిర్మించిన బాలసదనాన్ని జిల్లా కలెక్టర్ కుమార్ దీపక్, ఎమ్మెల్యే కొక్కిరాల ప్రేమ్ సాగర్ రావు, ఇతర అధికారులతో కలిసి ప్రారంభించారు. ఈ బాలసదనంలో 60 మంది పిల్లలకు వసతి, భోజనం, విద్య, వైద్యం, కౌన్సిలింగ్ వంటి అన్ని సౌకర్యాలు కల్పించారు.
మంచిర్యాల జిల్లాలో పల్స్ పోలియో కార్యక్రమాన్ని మాతా శిశు సంరక్షణ కేంద్రంలో శాసనసభ్యులు కొక్కిరాల ప్రేమ్ సాగర్ రావు ప్రారంభించారు. ఈ కార్యక్రమంలో మేయర్, డిప్యూటీ మేయర్, కార్పొరేటర్లు, వైద్య ఆరోగ్యశాఖ, అధికారులు, సిబ్బంది పాల్గొన్నారు. జిల్లాలో 76,367 మంది పిల్లలకు పోలియో చుక్కలు వేయాలని లక్ష్యంగా పెట్టుకున్నారు.
పీహెచ్సీ జైపూర్ పరిధిలో జాతీయ పల్స్ పోలియో టీకా కార్యక్రమం విజయవంతంగా నిర్వహించబడింది. ఈ కార్యక్రమంలో 5 సంవత్సరాల లోపు పిల్లలకు పోలియో నివారణకు రెండు చుక్కల మందు అందించి, 97.5% లక్ష్యాన్ని చేరుకున్నారు. వైద్యాధికారి ఆధ్వర్యంలో సిబ్బంది సమిష్టిగా కృషి చేశారు.
